La Usc di Ladins

La manifestazion, organiseda da la Union Generela di Ladins dles Dolomites y da la Comunanza Ladina a Bulsan, vegniarà tegnuda tla ciasa de cultura "Waltherhaus" da les 15:00. 
A la enconteda musicala tolarà pert i cors chisc cors:

• Cor di mutons de Sëlva
• Cor Pices Usc – Mareo
• Pico Coro Col di Lana – Fodom
• Le Muse e le Dolomiti – Cor interregional
• Voci Bianche e Junior Sante Sabide – Friul
• Coro Voci Bianche CORIandoli – Bulsan
• Ensemble “Voice 4 fun” – Terlan

Da les 2 domesdì defilarà i partezipanc dles valedes ladines y de Bulsan y Terlan, dlongia ai ghesć furlans, acompagnés da n grup musical de Gherdëina, sun la plaza dant ai palac provinziai, ciantan n inn ladin.
Dedò podaran vive l festival musical tla Waltherhaus, olache vigni cor portarà dant trei cianties. 
I cors de Bulsan y Terlan lasciarà audì dlongia a composizions per talian y todesch, ence cianties ladines, sciche segn de vejinanza y armonia anter i grups linguistics. 
Dlongia la promozion dl cianté ladin anter i mendri y joegn, se tol l'iniziativa enscì dant l fin de n dialogh y na convivenza vita anter les realtés culturales y linguistiches desferentes de nost raion.