La Usc di Ladins

Do n 2025 dolarata chît, án en mertesc ai 9 de jügn indô sintí la gran forza dl rî tëmp y dles eghes, y sciöche plü gonot, é Al Plan indô n iade sté n "hot spot" dles tempiades. Defata do les 7 da sëra él gnü na gran scurité sö a cil y impara n temporal cun plöia groia, che á desćiarié te püch plü co mesora chi 50 mm d’ega – ó dí: 50 litri por mëter cuadrat. Tosc á metü man da stlinghiné ince telefons y pipseri di stödafüch, che á messü fora incër 20 iadi, nes dij le comandant Christian Rindler, por intervënc te n gröm de posć, danter eghes che jô porsura, eghes te frabiches y material da romené demez.

La gran cuantité d’ega á fat jí en tilt na pert dl’infrastrotöra. Chësc dantadöt tla strada Plazores, le "post plü zîte" de chësta sëra, sciöche le comandant spliga. La condüta n’é nia jüda al vare cun le frabicamënt y é massa debla, tan che la strada s’á trasformé te n rü che se chirî i trus n pü’ indlunch. N toch de marciapîsc é tomé ite y i rüs d’ega s’á fat pormez a deplü strotöres. Dantadöt te n gran hotel é les eghes rovades te garasc, te salf da mangé y te ciamenes. Eghes é ince rovades te cianoa de n hotel tla strada Al Plan Dessora y na strotöra tl raiun de Pelegrin. I tombins ne pordujô te plü posć nia plü do y spodâ sö l’ega; insciö tla strada Catarina Lanz cuntra le zënter, olache les eghes é ince rovades pormez a döes ciases. Cotan de material y peres él ince gnü jö dala pert da Sarjëi, ince chiló cina pormez a na ciasa.
Intervënc ál spo orü ester incër paisc, olache al s’á slunfé le Rü de Chi Vai cuntra La Miara y ince le Rü de Ciastlins daite da Lech dla Crëda. Le plü s’á lascé adintëne indô le Rü dal Ermo, che á implí ite le let dl rü cina a Ciamaor, tratan che lignan s’á ince impiré sö püch defora dal lech di pëiapësc, pro i mürs dla vedla dega. Chi dai Rüs y lauranc cun les pacheres é bele da doman incá söl post por romené fora material. La strada danter Ciamaor y Pederü é intant stlüta.  (pablo)