La Usc di Ladins

La Müjiga Calfosch-Corvara adöm ala “Groovy Wind Band” á metü a jí le tradizional conzert d’aisciöda en vëndres ai 15 de ma tl salf dles manifestaziuns Franz A. Rottonara a Corvara. Le conzert d’aisciöda é tres ocajiun da ti surandé a n valgügn mëmbri i diploms por les medaies de prestaziun sciöche onoranzes por i tröc agn de ativité. 
Do avëi surandé les medaies de prestaziun eson passá ales onoranzes por i tröc agn de ativité tla uniun da pert dl’Assoziaziun dles Musighes de Südtirol, surandades en chësta sëra dal surastant di mënamaza dl raiun de Puster Franz Plangger, dal presidënt dla Uniun dles Musighes Val Badia Heinz Canins y dal ombolt Roman Crazzolara. 
L’onoranza plü »pesocia« an lascé ala fin: cun gran reconescënza ti él gnü surandé a Conrad Irsara la gran onoranza de or por ester sté 60 agn mëmber dla uniun. Conrad é sté un di pilastri dla Müjiga Calfosch-Corvara mostran tres sö süa pasciun por la musiga adöm a süa trumbata, mo suradöt ince por so gran impëgn tla uniun.

Stefanie Irsara,
por la Müjiga Calfosch-Corvara


Deplü da lí sön l'evënt ciafëise tla ediziun nöia de vëndres ai 5 de jügn!