La Usc di Ladins

La data di 14 de messèl del 1946 la é restèda te la storia di ladins, che te chel temp de meseria do la vera i à palesà te na gran manifestazion endrezèda sul jouf del Sela da Zent Ladina Dolomites sia revendicazions desche popul con na identità unitèra. Chest 80° cedean vegnarà recordà, descheche se lec la pruma piates de chest sfoi, da l'Union Generela di Ladins, che te chisc egn no à mai lascià ló de se dèr ju per chierir de tegnir ensema e jir inant adum. 
Ence l Comitat de la Gran Festa da d'istà e l Comun de Cianacei à volù ge dèr peis a chest event storich, con vèlch neva che se podarà descorir dai 11 ai 13 de setember, ma ence con na mostra sul vièl enlongia l Ruf de Antermont che restarà fora dut istà. Vigniun di 12 tulins reporta per ladin, talian e ingleis l test de un di 12 ponc porté dant enlouta con gran anteveder dai ladins sul Sela e n retrat de chela giornèda storica, metù a la leta dal Istitut Cultural Ladin 'majon di fascegn'.

Apontin l ICL, con sia diretora Sabrina Rasom, se à tout su la moderazion de la meisa torona che à inaudà la esposizion e che se à dejout ai 28 de mé te sala del Consei de Comun de Cianacei tel chèder de l'Aisciuda Ladina, event endrezà te Fascia dal Comun General con l Istitut Cultural, la Scola e l'Union di Ladins.
L salut, apede che dal Conseier de procura del CGF Bernardino Chiocchetti, é ruà dal vizeombolt de Cianacei Dimitri Demarchi, che l à sotlineà l'atenzion de la Gran Festa per l'identità ladina e l à recordà l gran lurier fat da Nicoletta Riz, che no la podea esser. A ela é jit l rengraziament tant da Demarchi, ence a inom del Comitat, che da la diretora Rasom.

Podede lejer dut su La Usc stampèda dai 5 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)