"Toi toi toi!"

Data

14 de jugn 2016

Galaria retrac

Grandeza scritura

Social

En gaujion dla prejentazion dles does scuadres ladines a l’Europeada 2016, "Les Ladines" y "I Ladins", ai 13 de jugn 2016 a Corvara, él vegnú adalerch n bel grup de funzionars dles unions sportives dla Val Badia y autorités dal mond politich-cultural dles vals ladines. Ghesta d’onour é steda l’assessoura provinziala y vizepresidenta dla FUEN di ultims agn Martha Stocker.

Danfora y danterite á cianté l Cuartet Göma, da "Bel lingaz dla oma cara" al Inn Europeich. Moderé l domesdí á l coordinadour di Ladins a l’Europeada y vizeombolt da San Martin de Tor Giorgio Costabiei. I saluc ofiziai per "Les Ladines" y "I Ladins" y duc i ghesć é vegnus dal Deputat ladin a Roma y vizepresident nuef dla FUEN Daniel Alfreider, dal assessour provinzial ladin de Bulsan Florian Mussner, dal assessour regional a les mendranzes Bepe Detomas, dal Ombolt da Corvara Robert Rottonara, dal sourastant dl Comité d’organisazion dla Europeada te Südtirol Siegfried Stocker y da l’assessoura provinziala y ex vizepresidenta dla FUEN Martha Stocker.

Auzé fora él vegnú l’importanza dl sport per l dialogh soura i confins geografics fora y la ousc che les mendranzes ciafa tres l’Europeada. Per l popul ladin é l’Europeada ciamó lapró, y dantaldut, na chance de enconteda y conescenza interna, per strenje n liam che i confins aministratifs y politics arfera ence te na Union Europeica.
A "Les Ladines" y a "I Ladins", les does scuadres che raprejenteia la jent ladina dles Dolomites te chest campionat internazional ti él ju da duc i versc n gran "toi toi toi"! (Iaco Rigo)