La Usc di Ladins

Che l se tratova de na ucajion mpurtanta per la lia àn nce udù dala prejënza de reprejentanc dla istituzions. Tla biblioteca dla Cësa di Ladins iel n lunesc ai 28 de auril, unic adalerch nce l diretëur dl Departimënt Scola y Cultura ladina dla Provinzia de Bulsan André Comploi y l diretëur dla Repartizion aministrazion scola y cultura ladina Mathias Stuflesser. Tramedoi à abù paroles de lauda per la lia. Comploi à dit: “L ie l prim iede che son unit a na vosta senteda y son defin ntujiast dl prugram che ëis fat. Arëis dut l sustëni da nosta pert, finanziel ma dantaldut dl cuer”. Che la Ulg ie una dla puecia lies che mët l azënt sun la cultura ladina, à Mathias Stuflesser ulù lecurdé: “La Union di Ladins de Gherdëina à te duc chisc ani fat zeche cun la Cësa di Ladins. L ne n’ie nia n cajo sce la jënt dla universiteies cherda su nce tlo per avëi nfurmazions”.
Nia mancë pra la senteda ne pudova sambën la presidënta dla Union Generela di Ladins dla Dolomites, Milva Mussner. Ëila à auzà ora la bona cunlaurazion danter la doi lies, “la Union di Ladins de Gherdëina ie pu l motor, che deberieda cun la Union di Ladins dla Val Badia, à trat l ciar dla Generela”.


Elisabeth Kostner

Dut l articul dla senteda pudëis liejer tla edizion nueva che vën ora duman, vënderdi, ai 9 de mei.