La Usc di Ladins

La veles dl ambolt y dl Cunsëi de Chemun ie zeche che à pëis per n chemun y per si daunì. Ai 4 de mei ie i zitadins y la zitadines jites a lité; ncuei iel unit ora i resultac tan che definitifs.

Do trueps ani che l ie stat n ambolt dla Lista Zivica te Sëlva, iel unì lità chëst iede Tobias Nocker, candidat dl SVP cun 818 ujes per ël, l 61,2%. Chëstes ie bën 300 ujes deplù che chëles che Ivo Insam (Lista Zivica - cun 518 ujes -) à giapà. Pra la SVP iel ot cunselieres ruvei te Cunsëi, pra la Zivica set.
A Santa Cristina à l ambolt da dant, Christoph Senoner, inò giapà la crëta dai zitadins: 623 ujes, l 74,8% à ulù ël. Monika Zelger à giapà 210 ujes, l 25,5%. Ma: cunselieres che ruverà te Cunsëi cumpëida deplù la Lista Zivica, plu avisa saràl nuef. La SVP n cumpederà sies.
A Urtijëi iela jita ora propri per puech. Tobia Moroder ie inò ambolt cun 1.164 ujes per ël, l 51,1%. Ewald Moroder nen à giapà 1.114, l 48,9%. Chël ie mé 50 ujes de manco. Cunselieres cumpëiden, sibe pra la SVP, che la Lista Unica, nuef.

A Ciastel ie Cristina Malfertheiner Pallanch (SVP) inò ambolta cun 2.321 ujes per ëila, l 18,9% permez ala 576 ujes che Simon Profanter (Lista Liedia) à giapà; l 19,9%. Coche reprejentanc ladins iel unì lità ite Walter Alfarei y Iris Gartner.

Duta la statistiches y d'autri numeri, inuemes di cunselieres y ntervistes pudëis liejer tla edizion nueva, che vën ora n vënderdi ai 9 de mei.

Julia Lardschneider