La Usc di Ladins

Do Carlascé, cun Capiun (mercui dal cënder), mëtel man la Carsëma. Caranta dis por s'arjigné ala Pasca, festa de Ressoreziun. Tratan la Carsëma vëgnel jiné. La Dlijia scri dant che le vëndres ne dessel nia gní mangé cern. Mo ó pa pordërt chësc ciamó al dedaincö dí jiné? La cern, che ê inlaôta n alimënt nobl, podunse pö sëgn se cumpré döt l'ann y sce i la lasciun fora y i ne la mangiun nia le vëndres ne se fejel – arati – nia fora tan tröp. Jiné, sce an ó le fá, desson da me infora d'atres cosses: ci che sá bel, ci che plej y ci che sá bun. I golusc dess jiné papes y ciuchelada, chi che ti ciara ion a la televijiun podess por ejëmpl renun­zié na sëra da la impié. O ciodí ne podesson pa nia renunzié n de ai socials, a Facebook, a Instagram y plü en general a internet? Chël foss bunamënter plü ri da fá; mo chël oress spo veramënter dí jiné, renun­zié.
Tl tëmp particolar che i viun sëgn me damani indere tanc de nos che ó y che á ciamó vëia da jiné. Sce i ponsun zoruch, él da n ann incá che i renunziun: i ne podun nia plü viagé y rodé incërch, i ne podun nia se möie sciöche i orun. I n'un nia plü la liberté che i ân denant, i ne podun nia plü cis sozialisé. I messun renunzié da sté cun i compagns, da se incunté, da fá festa y da se devertí. I messun tigní les destanzes, ince da chi che i orun. I ne podun nia plü se abracé, i ne podun nia bajé. I se l'ún n pü' godüda tratan l'isté, chël é ince da dí. Mo cina sëgn unse messü renunzié ala sajun da d'invern. Al é n bel invern, cun tröpa nëi, i podun fá tröpes ativités alaleria.
I ún plü tëmp da ti dediché a nostes families. Mo nüsc mituns ne pó nia plü jí cun continuité a scora y tröc de nos ne pó nia lauré. Y iló ne se trátera bel plan gnanca plü de renun­zies. La situaziun vëgn tres plü da sté ert, ince economicamënter. I se dessenun cun i politics che se stlüj tres indô daite. Mo impó messunse ti stimé. I ne le fajun mine por nia! I le fajun por sconé les porsones plü debles, por ne suraciarié nia i ospedai. Por nos él renunzies, por d'atri él la poscibilité da resté sagns, da ne se amaré nia, da ne rové nia te ospe­dal tacá ite te n respiradú. Eh, al é da n ann che i jinun, che i renunziun. I sun stüfs, mo bel plan unse metü man da se ausé.
I le savun pö, buna­mënter messarunse ciamó vire n pez cun chëstes renunzies. Tan di n'él degügn che sá da dí. Mo sce do caranta dis se röia la Carsëma, se rovará – tert o adora – ince chësc tëmp. Al gnará Pasca y i podarun tlafinada lascé da jiné y da renunzié. Ci bel che al sará!  (de Katia Pizzinini)