La Usc di Ladins

La strenta de man anter Walter Ghetta e Pier Paolo Trottner sul ciamp de balon de Cotura fasc da testamonech del passaje ofizial de la enciaria de president del Fascia Balon. Na enciaria che Walter à scuert per 35 egn che, metui apede ai 12 da jiador, fasc 47 egn de lurier, dedizion, pascion, amor e vita per la sozietà sportiva. Le consegne é state fate en ocajion de la radunanza di sozi stata a la metà de oril ma enstadì, con chel segn fort, man te la man e eies ti eies, se à entenù amò de più l valor de chel moment. »Se cognesse dar na definizion de che che l é Walter per la sozietà – à dit Pier Paolo Trottner – cognesse dir che l é l pare del Fascia Balon, el l se à dat ju per l ciamp, per le squadre, con la presidenza; se n muie de jent jia a balon cognon ge dir detelpai a Walter. Canche l à palesà l intezion de lasciar ló, anter dirijenc aon dezidù che ogneun aessa cognù far so toch, percheche far che che fajea Walter per noi no fossa dalbon possibol. Na persona coscita per la sozietà no la troon più – disc amò Trottner – noi faron de dut per far miec possibol. Aon 300 tesseré che jia a balon e 60-65 omegn che se dasc ju con desvalive enciarie. Per dut l lurier che l é dintorn cogne rengraziar en particolar la secretara Emanuela che la fasc dalbon n muie per la sozietà.«

Se pel lejer dut su La Usc nr 19 dai 23 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper
 (Monica Cigolla)