La Usc di Ladins

Y ince le campionat dl palé 2024/25 é jü a piz. Les partides dla ultima fin dl’edema é stades les ultimes por les scuadres de terza y de pröma categoria dla Val Badia. Les döes ladines tla terza n’á nia albü partides saurides. La scuadra dl Mareo/La Val á soghé te ciasa cuntra Wiesen, mo á messü se dé sot por 0 a 2. La scuadra dl ACD Val Badia é indere jüda a soghé sön le pice ciamp da Raas, mo á ince messü ti la zede ai aversars por 3 a 0. Intrames les scuadres á arjunt 15 punc te döt le campionat y é feter jödapé tla classifica – la Val Badia al 10. post y le Mareo/La Val al 11. post. Dessot él ma le Prettau che n’á fat gnanca n punt su.
La scuadra dl ASC Mareo te pröma categoria á indere stlüt jö en belëza, baton te ciasa le Terenten por 5 a 2. Cun chësta devënta án stlüt jö le campionat al 10. post cun 30 punc, sön 14 scuadres classificades. Le travert dla salvëza é porchël garaté deplëgn. Do la partida á le Mareo ciamó fat festa y á tut l’ocajiun da tó comié da sü alenadus Wolfgang Dorigo, Günther Geiregger y Paul Chizzali. Ëi é gnüs premiá cun n bel cheder cun na malieta dl Mareo, y ti lasciará lerch tl proscim campionat a alenadus nüs.  (pablo)