La Usc di Ladins

L'Austria dauriará tosc sö les ativités turistich-gastronomiches (ai 19 de ma), y s’arjigna ca ince bele cun la tlassificaziun dles naziuns de proveniënza.

Da incö inant n’é la Talia nia plü "raiun de inzidënza alta". Porchël vélel por i passanc dla Talia y i lauranc dla Talia che vá y vëgn le dovëi da presenté n test antigenich o PCR nia plü vedl co 7 dis (cina sëgn messâl ester jonn cina 72 ores). Mo al vel inant le dovëi de iscriziun dl azes tl’Austria ales autorités competëntes.

Cun le de 19 de ma 2021 gnaral daurí dlungia ai seturs dl turism y dla gastronomia ince:
- le monn dl’ert, dla cultura, dles termes, dl bëngester fisich ("wellness"), dl tëmp lëde y dl’aurela cörta
- precondiziun é la detlaraziun (o "pass") che an á la variora, le test negatif o che an é varis dala maratia; ince tesć fat instësc/sses valará
- cun le de 19 de ma 2021 tomará la carantena por la jënt che vá tl’Austria; ara ará ma da mostré sö le "pass"
- cun le 1. de messé 2021 arata le govern austriach da ester tan inant cun les variores da podëi daurí sö spo indó deplëgn la vita publica y privata.

A vigni manira pó cun le 19 de ma 2021 pié ia la sajun turistica tl’Austria. I ghesć ará le "pass" y insciö l’ocajiun da ne sté nia inré.  (Iaco Rigo)