La Usc di Ladins

L’é peà via chesta setemèna l rich program de la setima edizion de Suns Europe, che ence chest an, vedù l bon ejit de l’an passà la va inant con l’idea de tramudèr a d’istà dut l zircuit internazionèl.

L gran event é endrezà da La Coprativa Informazione Friulana con Radio Onde Furlane col sostegn finanzièl de la Region autonoma Friul Venezia Giulia, de l’ARLEF (Agjenzie Regjonâl pe Lenghe Furlane) e de Fondazione Friuli chest an l met dant 14 apuntamenc te 9 desvalives comuns del Friul.

No demò musega, ma ence film, teater e letradura vegn uzé fora da Suns Europe, te n confront anter lengac che à na storia veiora e formes de comunicazion modernes e contemporanees. Èrt, contaminazion, talent, pluralism linguistics e creatività l’é i protagonisć de chest event che se met dant de ge dèr lèrga e visibilità a la produzions artistiches desvalives e sćiantives te duc i picoi lengac de nosc veie continent, per desmostrèr che tegnir sù la desvalivanzes no l’é demò n derit fondamentèl, ma ence na richeza culturèla e na ressorsa creativa straordenèra. 

De gra a la colaborazion con n muie de sogec publics e privac, desche l’istitut basch Etxepare, e a la direzion artistica de Leo Virgili, Udin e l Friul doventa donca per doi setemènes crousdevìa de cultures e de artisć, zenter de contaminazion e confront.

L rich program é tacà ai 20 de messèl e en sabeda ai 31 sarà l gran conzert de Suns Europe al Ciastel de Udin, con gropes e artisć selezioné dal Friul, Sardegna, Paìsc Basch, Føroyar e Grijons. L’entrèda é debant ma con prenotazion de obligh sul sit sunseurope.com olache se pel veder avisa dut l program.

De più su La Usc stampèda de vender ai 23 de messèl.


 (Lucia Gross)