La Usc di Ladins

Da pech desvaliva sociazions e volontadives se dèsc jù per portèr inant e fèr crescer n nef projet, che l’à inom »Donotrentino« e l tol ite Trentino Solidale, la CS 4 onlus de Perjen, la Caritas Diocesana, la sociazion Rotte Inverse de le Sarche e n grop de zitadins atives.

Chest projet l’é nasciù a veder, da na man, cotanta de roba amò bona che vegn trat demez e da l’autra cotanta de jent che à de besegn, con chela de creèr n post sorì olache se posse sporjer e domanèr, ge dajan na seconda vita a la robes, con fins de solidarietà e no de comerz.

Donotrentino l’à vent del 2020 l concors »Intrecci possibili«, l bando metù a jir da l’Ofize sVOLta, lech nasciù per valorisèr l volontariat creà da Fondazion Caritro, Fondazion Trentina per l Volontariat Sozièl e Non Profit Network – CSV Trentino. 

Per se fèr cognoscer te dut l Trentin e no demò te zità, da pech i referenc de chest projet se à prejentà travers na scontrèda video ence te Fascia, con chela de tor contat e proèr a tor ite la desvaliva soziazions del teritorie desche la Crousc Checena, Fascia Solidala, l Grop miscionarie Freinademetz e la Coprativa sozièla Oltre, troan la piena desponibilità ence del Comun General de Fasica con si Servijes sozio-assistenzièi.

L sistem l’é sorì e l somea chi che se troa jà te internet olache i privac pel vener o comprèr roba durèda de ogne sort, ampò te chest cajo no vegn fat comerz. Su la piata donotrentino.it se pel donèr o domanèr bens o servijes. 

Duc chi che vel donèr vèlch i pel l fèr, dò se aer registrà, metan ite sia desponibilità aldò de la categorìes pervedudes, e i pel ence jir su la pèrt »chiere« per veder che che fossa de besegn.

Te la pèrt »cerco« ampò pel meter sù si inserac demò la sociazions o i sogec acredité, che i pel fèr da pont de referiment sul teritorie per duc chi che à de besegn. Chest l’é stat pissà per schivèr che chest sit posse doventèr comerzièl desche tropes etres che se troa tel web, ma soraldut per arsegurèr la condizions de besegn de chi che domana e ence sia privacy.

La piataforma é jà ativa e belebon envièda via per la pèrt de l’oferta, ma la cogn amò mingol crescer e se svilupèr per poder smaorèr soraldut la pèrt de la domana e di besegnes.

I Servijes sozio-assistenzièi del Comun General de Fascia e l Grop Miscionarie Freinademetz endèna i à dat sia desponibilità a veder se sul tegnir de Fascia podessa vegnir dant domanes e donca fossa de utol che ence te Fascia sie na sociazion o n ent acredità per fèr da pont de referiment. 

I enteressé i pel se oujer te la redazion de Fascia de La Usc di Ladins, domanan de Lucia Gross.