La Usc di Ladins

JÍ SOT* 

Trá ala niza 
por s’un cavé dai molá dla spona 
crödia, da sëciores malpatides 
confidan t’amirís plü grassins 
lëdi sot la löna. 
Nöt bludra, 
nia tl poch. 
Tl cör desperada speranza 
de ejistënza miorada 
iadelá, ti paisc dai üri slunfá. 
Dal mer, t’en iade, l’infer. 
Ones indiaolades, 
strudli ariciors, süsć spaventusc 
sprigora i pësc y impiza la pora 
ti passajiers de n loter Caronte. 
Ai svaia do aiüt, ai scraia cun düt 
l’ fle che ti resta, dis alalungia 
...vox clamantis in deserto... 
Cun pëigra, assassina angonia 
s’un vá vignun ala nia, 
vita nasciüda ala mort 
tl gran vënter lüter y scür, 
olache l’ destin mëss se ponn 
zënza confort y zënza pordonn 
tla fossa de na cortina infinida, 
desćiaria desman de umanité ferida. 

Ai 21 de aurí 2021 é 130 porsones mortes te mer, arbandonades a so destin, do avëi imploré aiüt por dui dis alalungia. 

Carlo Suani (pröm post)