La Usc di Ladins

Al ne joa nia. Canche n auto á intan d’agn sön les rodes, spo mëssel gní baraté fora. Chësc vel ince por i stödafüch, che adora mesi al vare cun i tëmps, por podëi daidé indortöra canche ara vëgn a chëres. Le tanch di Stödafüch da San Martin é ince rové a 33 agn de vita, ci che á porté y forsc ince sforzé la uniun da le baraté. La domënia ai 6 de setëmber éra stada tan inant che an á podü benedí ite le meso nü. Dlungia i omi di stödafüch da San Martin, les totes y le grup jonil dl paisc, él ince rové alerch le vizepresidënt dl raiun dla Bassa Val de Puster Elmar Irsara, l’ispetur dl raiun Bassa Val Badia Alex Zingerle, les delegaziuns cun la bandira di stödafüch da Lungiarü, Antermëia, La Val, Rina, Al Plan y La Pli y les autorités cun l’ombolt y responsabl dla proteziun zivila Giorgio Costabiei, le comandant di Carabiniers d’Al Plan Alessio Lepore y le comandant di Verdabosch Heinz Tschaffert.
La festa á metü man cun l’ingres da plaza dla scora sö, olache la Musiga da San Martin á acompagné i antergnüs y le meso inforní cina pro paiun de paisc. Dailóá don Marco Veghini zelebré la mëssa alaleria, abelida dal Cor di mituns da San Martin. Don Marco á dedô ince cherdé jö la benedisciun dal Alt sön la mascin nöia y sön i stödafüch che l’adorará.

Deplü podëise lí t’La Usc di Ladins di 27 de setëmber  (pablo)