La Usc di Ladins

N'autra bela neva rua per l liber 'Flora de Fascia', dat fora l meis de mé de chest an da l'Union di Ladins de Fascia. Chesta publicazion che met adum botanica e linguistica, metuda adum da Alberto Chiocchetti e Nives Iori con la colaborazion de Marco Detomas, à abù dassen n suzes sorafora la previjions, tant che oramai la copies de la pruma edizion é fenides e l é do a vegnir programà la pruma restampa.
Apede chest, ti dis passé l é ruà la comunicazion che 'Flora de Fascia' se à vadagnà n post anter i finalisć del Pest nazional 'Zità de Busan'. Se trata de n recognosciment dassen emportant, ajache per chest pest prestigious, che ge aur si ujes ence a publicazions per ladin e per todesch, l é ruà ite passa 200 proponetes da duta la Tèlia e ence da foravia: 'Flora de Fascia' l é l soul liber no per talian che i componenc de la giuria, vidèda da Raffaella De Rosa, à stimà meritegol de aer l azes anter i miores 20: 10 i é te la sezion dedichèda ai romans e 10 te chela dedichèda ai 'saggi', olache troon apontin l liber de botanica de l'Union di Ladins de Fascia. 
Ence la publicazion del Istitut Cultural Ladin de Fascia su Franz Dantone Pascalin à tout pèrt a chest concors, ma la é restèda fora da la strenta resa di finalisć.
La premiazion del pest 'Zità de Busan' sarà te l'Aula Magna de l'Université Ledia de Bulsan en sabeda ai 26 de setember da les 10:30 tel chèder del festival 'Orizzonti Culturali': duc pel tor pèrt a la premiazion, e endèna l é segur da ge fèr i complimenc ai autores ladins de 'Flora de Fascia'.

La premiazion del pest 'Zità de Busan' l é un di momenc de n event cultural che jirà inant per trei dis, dai 25 ai 27 de setember, per endrez del Comitat de Busan de la Sozietà Dante Alighieri con a cef Raffaella De Rosa e de n bel grop de joegn engaissé, e l à l patrozinie del Comun de Busan. L coordenador l é Matteo Azzolini Poggioli, n joen student da Moena che é do a se laureèr en Economia e Gestion Aziendala a l'Università de Trent con na tesi che à per argoment apontin chest event.


Podede lejer dut su La Usc stampèda de vender ai 18 de setember da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)




 (Lucia Gross)