La Usc di Ladins

L decret lege preveid che dut l personal dles Aministrazions publiches é tegnù a avei la Zertificazion verda Covid-19. L dovei reverda laprò l personal de Autorités independentes, Consob, Covip, Banca d’Italia, enc publics economics y organs de relevanza costituzionala. L vincul vel ence per i titolars de ciaries litales o de ciaries istituzionales de importanza. Ciamò laprò é l dovei destenù fora ai sojec, ence esterns, che desfira a vigni titul efetif, sia ativité laorativa o formativa pro les aministrazions publiches.

Organs costituzionai
L dovei de green-pass vel ence per i sojec titolars de ciaries litales y de ciaries istituzionales de relevanza. I organs costituzionai adateia si ordinament a les desposizions nueves sun l’adoranza dles Zertificazions Verdes.

Laour privat
Ence les persones che desfira vigni sort de ativité laorativa tl setour privat é tegnudes a mostré su sun domanda i Zertificac Verc. L posses y la mostra dl Zertificat Vert, sun domanda, é de dovei per azede ai posć de laour.

Tesć a cost regolé
L decret preveid l dovei per les apoteches da fé i tesć antigenics asvelc aratan i priesc definis tl protocol de acordanza firmé dal Comissar straordinar per l’atuazion y l coordinament dles mesures de conteniment y contrast dl’emergenza epidemiologica Covid-19, a una con l Minister dla sanité. L dovei vel per les apoteches che à i criters scric dant. 
Les normes nueves preveid laprò che i tesć é debant per les persones che n’à nia bria da fé la vazinazion per gaujes de sanité.

Tribunai
L personal aministratif y i magistrac à da avei les Zertificazions Verdes, per l azes ai ufizes giudiziars. Al fin da consentì la destrigheda plena di prozedimenc, ne vegn l dovei nia deslargé fora a avocac y d’autri defensours, consulenc, peric y d’autri ausiliars dl magistrat nia dependenc o colaboradours interns dl’aministrazion dla Giustizia, testemoni y perts dl prozes.