La Usc di Ladins

»L é stat na esperienza de chele che se fasc demò na oita te la vita«. L é la pruma paroles che ne disc Alessandro Chiocchetti da Moena, da n muie de egn oramai enciasà a Bruxelles olache sia cariera te la istituzions europeanes lo à portà fin a la encèria de diretor general al Parlament European. 

Al scomenz de chest an, canche Roberta Metsola é stata litèda al post de David Sassoli, la neva presidenta del Parlament European l’à cernù proprio l dirigent ladin desche sie prum colaborador, ge dajan l’encèria de »capo di gabinetto« coche se disc per talian. Te chesta funzion Chiocchetti à abù l peis e l’ocajion de endrezèr e tor pèrt a n event de gran emportanza: l viac a Kyiv, te la capitala del Paisc sot l assedie de Putin, ensema con la presidenta Metsola e n auter component de sie ofize, per scontrèr al prum de oril l president ucrain Volodimir Zelensky.

Per saer de più sun chest enconter é domanà fora diretamenter l dirigent european Chiocchetti.

Co éla nasciuda e co se àla dejout chesta scontrada storica?
L Parlament de l’Ucraina à envià formalmenter la presidenta del Parlament European, ma no l era tant sorì dezider de jir te n lech en guera. Ge aon pensà più che na setemana se jir o no, canche la Presidenta à tot la dezijion de jir aon cognù endrezar via dut te doi dì. No l é stat sorì, tant dal pont de veduda logistich che ence politich, cogneane esser segures che canche fossane ruè via, Zelensky l fosse stat amò desponibol. Giö ere en contat col goern ucrain, canche se à n raport diret l é mingol manco senester.

Se pel lejer duta l'intervista su La Usc stampèda de vender ai 8 de oril.  (Lucia Gross)