La Usc di Ladins

Secunda desgrazia te püc dis, sö por i crëps dl’Alta Badia. Mefodër ai 3 de messé â n turist argentin pordü la vita da gní da Gardenacia jö. Chësta sabeda ai 12 ti ésera sozedüda a n turist austriach de 71 agn. L’alarm é gnü dé püch dan les 12, canche le joler dl Aiüt Alpin s’á alzé tl’aria cun n grup de socoridus dl Aiüt Alpinisć Alta Badia, por jí dl vers de crëp dla Crusc. Sozedüda ésera söinsom Forcela Cöcena, olache le turist gnô do sëmena jö, canche al é sbriscé fora y é raité surajö, fajon n jore de incër 200 metri. Canche i socoridus é rová söl post, ési gnüs lasciá jö cun la binda, mo á ince atira capí che al n’ê plü nia da nen fá. L’alarm é gnü dé da n’atra porsona che ê püch dessot, canche ara é sozedüda. "Chësta ê ince sön sëmena, püch dessot, y á aldí sbriscian. Canche ara s’á ót söpert, ára odü l’ël che brodorâ jö", dij Fabian Oberbacher, surastant dl Aiüt Alpinisć Alta Badia. Atira á la porsona alarmé i socoridus, che n’á – sciöche dit – baldi podü fá nia ater che constaté la mort dl turist. Chësc sojornâ te n alberch a Badia y ê chiló dassú. Al é le compit di Carabiniers da La Ila, sciöche ince dla Finanza, da inrescí le sozedü y ince contaté i familiars. Le corp é gnü joré a Corvara, olache al é gnü metü te capela dai morc. Che al palses tla pêsc.  (pablo)