La Usc di Ladins

La Provinzia á mudé les desposiziuns dla deliberaziun nr. 1419 di 18 de dezëmber 2018 por la gestiun dles ciases de palsa, dantadöt ti punc che reverda le sorvisc de cura dla jënt atempada. Te Südtirol él 78 ciases de palsa, olache al ti vëgn dé habitat y cura a indöt zirca 3900 porsones.
Tl menü él gnü porté ite tla lege che le post de proveniënza dles porsones dess avëi da dí deplü en gaujiun dl’archirida de n post te na ciasa de palsa. Al dess i gní dé prezedënza ala jënt dl post. Chësta prezedënza vëgn arjunta cun la müda dl numer de punc al momënt dla domanda do n alberch: i punc totai vëgn alzá da 100 a 110, ai se mët adöm insciö: alplü 40 punc por le debujëgn de assistënza y cura, alplü 30 punc por la situaziun familiara y soziala precara, alplü 10 punc por la data dla domanda aratada regolara, y d’atri 30 punc (cina sëgn n’êl 20) é a desposiziun aladô di elemënc de valutaziun desvalis sciöche le post de proveniënza. Nü él ince sëgn che al vëgn trat jö 10 punc por vigni caje de renunzia a n post d’alberch pité.
Ince la rëi de comunicaziun danter les ciases de palsa é sëgn routine: cun n sistem de documentaziun di dac dles porsones che alberghëia y ciafa cura dessel gní coordiné damí vigni domanda y sorvisc.
Al é ince gnü porté ite tles desposiziuns na maiú flessibilité tla percentuala y tl raport dla sort de lec y ciamenes che á da ester te na ciasa de palsa.