La Usc di Ladins

I laours vegn dés ju demé tres via telematica a la miscion email ladinia.fotos@gmail.com enfin al plu tert ai 31.08.2022. La valutazion dla juria, desche ence la premiazion, vegnirà fates dant la fin dl ann 2022.

Obietif
Tres l tema LADINIA vuel l concurs fotografich respogne a la domanda: “Cie vuelel pa dì 'ester Ladins' encuei?”, y la scomenciadiva à l fin da tré empera l publich ladin sun na reflescion dessegur dret atuala: ester Ladins te n mond tres plu globalisé y conlié; cie valour à pa la identité ladina aldidancuei? Co éla pa mudeda? Cie vuel pa dì Identité Ladina dl 2022? Na reflescion che dessa se svilupé tres la racoiuda de material fotografich y se n prevalei propi di stromenc tecnologics nuefs.

Modalité de partezipazion
La scomenciadiva é daverta a dutes les persones zenza limic d’eté y al pò tò pert persones amantes dla fotografia, tant amatoriales che profescionistes. La partezipazion é ledia y debant. Vigni partezipant:a podarà mané ite al plu 2 (doi) retrac fotografics demé tres via telematica a la miscion email ladinia.fotos@gmail.com deberieda a les indicazions damanedes (ciala plu inant!). Les fotografies messa avei na bona ressoluzion per la stampa (305 dpi) y ales à da vegnì menedes tl format .tiff o .jpg (auta ressoluzion). Pro vigni retrat él da ti enjonté l titul, spo ciamò l inom y cognom dl:a autour:a, luech de residenza, miscion postala, telefon y contac e-mail, y na descrizion per l retrat (max. 100 caraters, lercs inclusives). La partezipazion é confermeda sce an à mené ite l material aldò dles regoles y desposizions. L material mené ite à da ester daldut personal. Dal concurs é scluc fora i comembri dla juria.

Contest y pesć
L concurs fotografich LADINIA preveid 3 (trei) davagnadours:desses lités:edes da na juria de esperc. Les imajes chirides fora da la juria vegnirà metudes fora te na mostra da vedei tl temp do la valutazion. Al podarà ence vegnì a s’l dé na mostra ambulanta. La juria sourandarà chisc pesć: 1. pest 800,00€; 2. pest 500,00€; 3. pest 200,00€. Souraprò él prevedù 1 (una) na premia dl publich tl valour de 200,00 euro da sourandé tres litazion sun i canai social Facebook y Instagram, a pié via dal prum de setember 2022. La juria pò ciamò laprò nunzié d’autri laours che ala rata dret menzioné – dé fora enfin a al plu 3 (trei) segnalazions.

Juria
La juria de esperc dl concurs fotografich LADINIA é metuda adum da 7 (set) comembri y ala tol ite a inom dl soget promotour Milva Mussner (vizepresidenta dla UGLD), desche sourastanta de juria. Laprò él l scultour, professour y artist Aron Demetz, i fotografs Helmut Elzenbaumer (president dl Fotoclub Val Badia y comember Strix - Fotonaturalisti Alto Adige), Diego Gaspari Bandion (Ampez) y Marco Tasser (Col), l diretour dl Istitut Cultural Ladin Cesa de Jan y rapresentant de Souramont tl Euregio Denni Dorigo y la dozenta y vizepresidenta dla comiscion culturala dl Istitut Cultural Ladin Majon di Fascegn Silvia Murer. La composizion dla juria ne pò nia vegnì striteda ju y sie giudize é definitif.

Responsabelté y oblianzes
Con tò pert al concurs LADINIA conferméien che les fotografies é vegnudes fates personalmenter. Menan ite l material fotografich zertifichéien ence laprò che i:les autours:res à dé la autorisazion plena da publiché sies fotografies, y chest ence adum a retrac de d’autri sogec. Al é responsabelté de vigni partezipant:a da se asseguré che les fotografies ne tire su degun strit legal. La juria se resserveia de scluje fora laours che contegn material oscen, sessual, violent, ofensif o calunient, material descriminent per ses, etnia y religion, o vigni auter laour che an rata nia adaté o che ne respogn nia ai criters y a la natura dl concurs fotografich.

Publicazions o de autres scomenciadives
La Union Generela di Ladins dla Dolomites podarà adoré danuef l material abiné adum per publicazions o d’autres scomenciadives, laprò ence publicazions stampedes, mostres, condivijions sun si canai de comunicazion o vigni autra scomenciadiva de promozion. L:a autour:a dles imajes ti zed duc i derc a la Union Generela di Ladins dla Dolomites, che podarà les adoré ledamenter. Te vigni sia adoranza vegniràl dé dant l:a autour:a con si inom y cognom. La partezipazion a la scomenciadiva scluj ite la vijion y l’azetazion dles condizions prevedudes da chest regolament y l consens al tratament di dac personai aldò dla normativa en doura. La bandida dl concurs fotografich LADINIA é publicheda sun i mesi de informazion: foliet d’La Usc di Ladins y te sia verjion online, sit web dla Union Generela di Ladins dla Dolomites, Facebook y Instagram.