La Usc di Ladins

»Se la joentù ge nearà l consens, ence la mafia misteriousa che dut pel desvanirà desche n strassomech«. L é paroles de Paolo Borsellino, l magistrat copà da la mafia en Via d’Amelio a Palermo jai 30 egn, ai 19 de messèl del 1992, ensema con autra 6 persones de sia scorta. Nience 2 meisc dant, ai 23 de mé, te la strage de Capaci a perder la vita l era stat sie colega e amich, l giudize Giovanni Falcone, con sia femena e autra trei persones.

Ades la joentù à scomenzà a ge neèr l consens a la mafia, pean via da la scola.
La lo à fat a la scola mesènes Spalatro de Vieste, olache del 2019 l é stat depent su la facèda n gran murales col retrat di doi giudizi copé e apede la paroles »La mafia si combatte a partire dai banchi di scuola«.

La lo à fat te desvalives licees de Trent, Seregno, Lodi e Montichiari, con n lonch lurier de cognoscenza e enrescida storica, de intervistes e scontrèdes online, de reflescions e emozions de 70 studenc. N lurier peà via tel prum lockdown e che, col coordenament del professor Alberto Conci, l é doventà n liber che à per titol apontin »Se la gioventù le negherà il consenso«.

N picol grop de chisc studenc, che jai 30 egn no i era amò nasciui, enstadì l era a Moena, a rejonèr de chest dedant a n piaz pien de jent. A rejonèr de persones da no desmentièr, de memoria che cogn doventèr forza e azion concreta, de testimonianza e empegn, de rescat e renovament, de speranza e davegnir. A recordèr che la delegitimazion e l solentum l é i prumes colpes sbaré contra chi che combat en pruma linia e che no se pel ge lascèr demò a pec “eroes” n doer che ne pervegn a duc.

A sotrissèr che l perdon l é na scelta individuèla che pel portèr a la libertà, ma ence na scelta coletiva che no pel esser arjonta zenza giustizia e che la verità neèda l é una de la ingiustizies maores.

Per Giovanni Falcone, Paolo Borsellino e duta la femenes e i omegn copé acà 30 egn la verità no é amò stata scrita, l codejel checen no é mai stat troà. I studenc à proà, con chest lurier, a ge dèr mingol de giustizia ai familiares de la vitimes che i à scontrà te chesta esperienza, che li à segné debel. »La bomba de chela strage ne à ciapà sot duc« à contà na testamonia, e chesta paroles l é doventà ence la paroles di studenc. De Gloria, che l’à tanche fenì la matura e l à dezidù de fèr giurisprudenza, per proèr a fèr sia pèrt per arsegurèr giustizia e deric; per vigniun de chisc studenc, che da aló i à peà via n nef percors de empegn.

A 30 egn da la strages de mafia de Capaci e de Via D’Amelio, ence de gra a azions concretes desche cheles de "Libera", la speranza renasc, ma l é na responsabilità massa grana per ge la lascèr ai singoi. »Se ogneun:a de nos ge nearà l consens, ence la mafia misteriousa che dut pel desvanirà desche n strassomech.

 (Lucia Gross)