La Usc di Ladins

En vender ai 29 de messèl dedant dal teater de Navalge se à binà autoritèdes ziviles e melitères per n moment ofizial de comemorazion. L event é nasciù tel chèder del 150° cedean del Corp di Alpins, che vegn recordà fora per chest an con desvaliva scomenzadives. 

L apuntament de Moena à vedù tor pèrt esponenc de l’aministrazion del Comun e ofiziai del Eserzit, ma ence n bel grop de bec. L event defat é stat endrezà da Giusy Furlanetto, che da 5 egn la é responsabola del zenter Fiabilandia sun Pra de Sort, tel chèder del projet »Viver la mont«, pissà per sensibilisèr i bec e dapò travers chisc ence i gregn, sui temes de la segureza e la prevenzion, che pea via da la cognoscenza e dal respet de la regoles e di drec comportamenc da tegnir sa mont, tant d’invern che d’istà.

»Moena l à na mostra su la Gran Vera e percorsc sa mont leé a chel event, che coi bec ti egn passé sion jà jic a veder – à dit Giusy Furlanetto – per chest en ocajion del 150° cedean del Corp nazional di Alpins me é pissà de conscidrar apontin ence a chesta piata de noscia storia e chesta idea é stata touta su bolintiera tant dal Eserzit che dal Comun de Moena.«

Do n curt moment de saluc e intervenc, gregn e picoi partezipanc à abù l met de vijitèr la mostra »La Gran Vera« te Navalge: i bec é jic do n percors più adatà a ic compagné da Ilaria Chiocchetti e Mario Gallarati, apede che da Giusy Furlanetto e i animatores de Fiabilandia, enveze l grop de militères e autoritèdes é stat vidà da Michele Simonetti Federspiel, che l é curator de la mostra e autor del nef liber »1914-1918 La Gran Vera. Moena e la Val di Fassa nella Prima Guerra Mondiale« che é stat dat fora l an passà dal Istitut Cultural ladin e prejentà a Moena ence en mercol passà. 

De più su La Usc stampèda de vender ai 5 de aost.  (Lucia Gross)