La Usc di Ladins

Studënc y studëntes dles valades ladines é rová adöm a La Ila por le convëgn dal titul »Lié adöm turism, sport y sostenibilité«. Le convëgn, organisé da Europe Direct adöm cun l'intendënza ladina dla provinzia da Balsan, é sté incö, lönesc ai 26 de setëmber, de europeich di lingac. An á insciö ince orü alzé fora l'importanza dl ladin, lingaz de mendranza, che manacia tresfora da jí sot, mo che pó ciafé vita nöia tres manifestaziuns sciöche chësta. Nia ma ladin, mo ince talian, todësch y inglesc é i lingac che vëgn insigná tles scores ladines, che i vá do al model paritetich. Le multilinguism é chël che le Consëi d'Europa ó promöie, deache la diversité linguistica pó contribuí da mioré la comprenjiun danter cultures desvalies y ester na pert fondamentala dl cufer cultural de vingi porsona. Chësc é sté le spunt che á porté Europe Direct da organisé le convëgn dediché ales studëntes y ai studënc ladins, sön tematiches importantes che ne reverda nia ma nostes valades, mo döt le raiun des Alpes: sostenibilité, turism, sport y Olimpiades, che gnará organisades dl 2026 danter Ampëz y Milan, mo che se lasciará jö ince tl Südtirol, en particolar cun les gares de biathlon che sará ite en Antholz. Sön paladina él gnü cherdé deplü reladus, che á respognü a deplü domandes sön chisc argomënc: l'ombot da Belun y ex atlet paralimpich Oscar De Pellegrin, le presidënt dl CAI Carlo Zanella, Madeleine Roher, direturia de CIPRA Südtirol, l'assessur provinzial Daniel Alfreider, Michil Costa, Max Nagler y Carlo Runggaldier, presidënc dles Cooperatives Turistiches dl'Alta Badia y d'Al Plan/San Martin. 

Tratan le danmisdé á spo i studënc y les studëntes podü tó pert a workshops adöm cun i reladus. Le convëgn se á stlüt jö cun na picia marëna tl foyer dla Ciasa dla Cultura, olache jogn y jones de valades vijines á podü sté n pü deboriada, imparé da se conësce, baié te idioms desfarënc le medemo lingaz, se sintion insciö pert dla medema comunité, chëra ladina.   (kp)