La Usc di Ladins

Chest temp del an l é rich de momenc leé a la tradizion. L é l temp de Sèn Nicolò coi Krampus e ence l temp di conscric. Tradizions veiores che se troa con vèlch varianta te duta la Èlpes e ence più dalonc. Tradizions che ampò ti ultimes egn é mudèdes debel, soscedan marevea o adertura desorientament e permèl, descheche se pel veder per ejempie te la letra a Sèn Nicolò publichèda te chest numer e ti comenc de n muie de jent che se à remì dijan »chesta no l é noscia tradizion!«.

Per chel che vèrda i Krampus, no l é dubies che ti ultimes 20 o 30 egn te nosc raion la tradizion no sie demò mudèda, ma la sie stata dassen straouta. N aee rejonà col antropologh Cesare Poppi acà 5 egn, canche l era ruà te Fascia apontin al scomenz de dezember e te chi dis a Poza l era stat la defilèda di Krampus e dapò la festa de Sèn Nicolò. 

Ben segur ence la tradizion di conscric muda, e l é ence n bon segn, ajache de spes se na tradizion no muda la é destinèda a se destudèr.

I simboi e i mudamenc che caraterisea la tradizion di conscric é stac touc dant en sabeda ai 10 de dezember ence te Museo Ladin, che l à envià i conscric de duta Fascia e l artist Claus Soraperra a n moment de confront per cognoscer e entener vèlch de più del segnificat de chesta usanzes.

Podede lejer de più su La Usc stampèda de vender ai 16 de dezember.   (Lucia Gross)