La Usc di Ladins

Anter i 11 e i 13 de setember a Lampedusa l é ruà 161 barchins con passa 7.000 migranc. A gestir chest gran numer de sbarches l é stat la Crousc Checena che à seghità a ge fornir assistenza enceben le gran dificoltà. L’isola é sutada per aria. Te chi dis a Lampedusa l era Giusy Sommavilla, volontadiva de la Crousc Checena e ere ju ence gio per vacanza.

"I prumes dis che ere ju tel hotspot i era ite demò de 19, più che auter mare e bec picoi, i spetaa na destinazion ajache coi mendres l é più senester e le prateghe é più longe. I volontadives aea tacà a meter a post l zenter, a netar su, a far i lurieres de manutenzion, i era duc più contenc: da canche l é la Crousc Checena che gestesc l zenter l é dut n’autra roba, i ne dijea. I sbarches i é taché l lunesc da sera, da le doi de not l é ruà i prumes 100 migranc anter Cala Croce e la Guitgia, che l é proprio le spiagie te zenter, no me aesse mai imaginà che da 19 i rue te pech temp a 7.300. 
No é mai vedù tanta fam e seit." disc Giusy Sommavilla.


“L’isola de Lampedusa la é cognosciuda dutintorn per sie mar cristalin, l é tant chiar e net che somea che le barche le sgole. Ma la é cognosciuda ence per i sacotenc sbarches de migranc e chest l é proprio vedù con mi eies. Ere a Lampedusa ai 12 de setember, l dì dal numer record de sbarches, passa 5.000 demò te na dì, coscita tenc desche i sentadins de l’isola.
Noi stajaane sora cala Madonna e l lunesc sera a se n jir a ciasa aon scontrà tel scur n prum grop de migranc, someaa zombie, i se fajea lum col fonin, i sćiancolaa. En chela not aon sentù i cighes de chi che ruaa su la costa coi barchins e da doman bonora aon vedù fora tel mar la naf de la Guardia Costiera che se n tiraa do n bel numer, chi più fortuné che aea amò l motorin tacà i ruaa direti su la spiagia."

Su La Usc stampèda de vender ai 22 de setember podede veder i retrac e lejer le doi testimonianze vivude en pruma persona de fac de cronaca che é rué sun duc i mesi de informazion.  (Monica Cigolla)