La Usc di Ladins

Dal vangele do san Mateo 20, 1–16a 

Te chël tëmp ti á Gejú cunté a sü discepui chësta parabola: »Cun le rëgn dl cil éra sciöche cun n patrun de n avëi, che s’un é jü da doman adora demez da ciasa, a tó sö oras por süa vigna. Al é gnü a öna cun i oras sön un n denar al de y al i á condüt te süa vigna. Dala terza ora él indô jü söl marcé, y n’á odü d’atri dailó che n’â degun laur. Al ti á dit: Jide ince os te mia vigna! I ves dará ci che é iüst. Y ai é jüs. Dala sesta ora y dala nona ora é le patrun dl avëi indô jü söl marcé y á fat le medemo. Canch’al é jü dala önejima ora ciamó n iade, n’ál indô urté de chi che stô dailó incërch. Al ti á dit: Ci stëise pa döt le de incërch a ne fá nia? Ai á respognü: Al n’é sté degügn che s’á tut sö. Dailó ti ál dit: Jide ince os te mia vigna. Canch’al ê gnü da sëra, á le patrun dla vigna dit a so aministradú: Chërda i oras y paii fora le paiamënt, meton man dal ultimo cina al pröm. Al gnô chi che ê gnüs tuc sö dala önejima ora, y vignun á ciafé n denar. Canch’al ê rové pro i pröms, minâ chisc de ciafé deplü. Mo ince chi á ma ciafé n denar porom. Dailó ái metü man da se lascé sö cuntra le patrun y dijô: Chisc ultimi á ma lauré öna n’ora, y tö i as traté anfat sciöche nos; nos deperpo un soporté döt le de le pëis dl laur y le cialt. Mo le patrun ti á respognü a un de chi: Amí, al ne te vëgn fat degun tort. Ne n’este nia gnü a öna cun me sön un n denar? Tol tü scioldi y vátun! Iö indere ó ti dé al ultim tan co a te. Ne pói nia fá ci ch’i ó cun ci che é mi? O este invidius, deach’i sun bun cun i atri? Insciö sará i ultimi i pröms y i pröms i ultimi.« 

Parora dl Signur. – Lalt a te, Gejú Crist!