La Usc di Ladins

Tla sentada di 9 de forá, á la Junta Provinziala aprové i finanziamënc por l’ativité 2024 dl Istitut Ladin "Micurá de Rü". Döt adöm vëgnel metü a desposiziun 381.690,00€ por le program trienal. De chisc ti vá 318 mile diretamënter al Istitut, tratan che 63.690,00€ vëgn metüs a desposiziun por formaziuns. "Ti proscims mëisc laurarunse pro la digitalisaziun, por svilupé n dizionar online y renforzé insciö l’identité ladina y garantí so lingaz y süa cultura", dij l’assessur ladin Daniel Alfreider. Travert dl Istitut é ince la inrescida scientifica sön lingaz, storia y cultura. En particolar él da alzé fora le laur por arjigné n tradutur ladin. "L’Istitut Ladin sostëgn la conescënza dla cultura ladina y porta pro al mantignimënt y al svilup dl lingaz scrit y baié, tres la publicaziun, le slariamënt y la venüda de publicaziuns linguistiches y culturales", dij la Intendënta Edith Ploner, "L’Istitut organisëia manifestaziuns y cursc de formaziun. Le sostëgn istituzional é de importanza fondamentala por contribuí ala identité storica y culturala di Ladins dles Dolomites."  (osp)