La Usc di Ladins

Al é bele plü agn che la discusciun vëgn fora: jí cun le lift d’isté é por tröpes porsones massa cer. "Seilbahnen nur für Reiche" – Implanc portamunt ma por i ric – titolâ l’ann passé placatif le foliet "Die Neue Südtiroler Tageszeitung". Do les polemiches dl ann passé, â l’assessur Daniel Alfreider incundé la orenté da se gní cun i implantisć por lié i implanc portamunt al Südtirolpass y pité insciö prisc plü basc. Sëgn ésera tan inant. Sciöche la Provinzia á lascé alsavëi te n comunicat di 10 de ma á l’assessur Alfreider, le diretur dl resort provinzial por Infrastrotöres y Mobilité Martin Vallazza, le presidënt dla Federaziun di Implantisć de Südtirol Helmuth Sartori y la manajadëssa dla Zentrala di Consumadus Gunde Bauhofer sotescrit l’acordanza por le "Isté söi lifc 2024". Dötes les porsones che á la cherta Südtirol Pass, Euregio Family Pass, Südtirol Pass Abo+, Südtirol Pass 65+ o Südtirol Pass free podará jí sö alalt cun i lifc a n prisc smendrí de almanco le 30%. Al’aziun tol pert passa 60 implanc di 100 che é en funziun d’isté. Düc i proprietars dles chertes suradites ciafará anter le 1. de jügn n adesif da taché sön le pass y chësc é spo da mostré deboriada cun la cherta d’identité pro les casses di implanc che tol pert. L’aziun döra por döta la sajun da d’isté.

Deplü sön chësta aziun ciafëise t’La Usc di Ladins di 17 de ma y sön la plata internet: www.suedtirolmobil.info/de/seilbahnsommer2024

 (pablo)