La Usc di Ladins

Ai 5 de jugn del 1947, te so descors a l’Università de Harvard, l Secretèr di USA George Marshall anunzièa chel che ge é stat dit »Piano Marshall« (European Recovery Program), un di pians politich-economics di Stac Unii per la recostruzion de l’Europa do la seconda vera mondièla che pervedea n stanziament de passa 12,7 milions de dolares. Do la gran destruzion portèda da la vera, l risech per gran pèrt del veie continent fossa stat n piorament de la condizions politiches, economiches e sozièles, da chiò l besegn de sostegnir la recostruzion con i gregn didamenc americhegn. Chel che se augurèa te chel descors l Secretèr de Stat no l era demò na colaborazion percacenta anter la doi spones del Atlantich, ma ence na pruma realisazion de chi projec europeisć che fin enlouta l era demò utopia.

La doi veres mondièles del secol passà à troà teren bon te l’Europa despartida te nazions e vardan al davegnir l’Europa spartida aessa raprejentà n element de destabilisazion per dut l pianet.

Con la recostruzion del continent european l é tacà n percors de integrazion che da n prum grop de 6 Stac fondadores l é cresciù fin a 27 Stac membres. Ai 5 de mé del 1949 l é stat metù su l Consei d’Europa col Tratat de Londra e da enlouta, Tratat do Tratat, l’Union Europea à ciapà forma col se dèr na strutura federèla per chel che vèrda l’union de la moneida travers la Banca Zentrèla Europea e la banches zentrèles a livel statal. Sul pian politich-economich, olache l é stat mantegnù l sistem intergoernatif, vèlch Tratat à raprejentà momenc de svilup inant e momenc en do. Na neva spenta emportanta é ruèda con la NextGenerationEu: l besegn de sostegnir l rescomenz do la pandemia e la cernuda de fèr na debita publica europeèna à metù a la leta n pian de didamenc travers n bilanz de set egn, dal 2021 al 2027, del valor de presciapech 1.800 miliarc de euro (800 miliarc de euro de la NextGeneration più i passa 1000 miliarc a budget).

L’Union Europea purampò no à tegnù cont di tempes de dezijion massa lonc e engatié, che ti aspec strategics cogn aer l’unanimità e ge dèsc a la mendranza l poder de blochèr la volontà de na maoranza de Stac de jir inant. Chest pecià originèl l é l resultat de n sovranism antistorich che i Stac de l’Union se à empontà a defener o con l’ambizion de renforzèr e che à portà a aer na UE semper manco competitiva economicamenter e politicamenter respet al rest del mond.


De più su La Usc stampèda de en vender ai 7 de jugn.  (Massimo Girardi)