La Usc di Ladins

L é ruà a piz l scrutinie di Comuns de Fascia e se à desfantà la tema che ti 4 Comuns olache l era una soula lista vegne a mencèr l quorum. Te Fascia no sarà donca nesciun comissarie, enceben che, soraldut a Soraga e a Sèn Jan, sie jit a litèr demò presciapech la metà di sentadins che aea derit.
A Cianacei, olache de contra al ombolt di ultimes 5 egn Giovanni Bernard se aea metù con na lista Roberto Guglielmi, Bernard l é stat confermà passan via l 66% de la stimes. Conferma ence a Mazin per Fausto Castelnuovo che aea de contra Mariaemanuela Spinel, che se à fermà pech sora l 30%.
Chisc i ombolc ti etres Comuns: a Ciampedel Alessandro Bernard, a Sèn Jan Giulio Florian, a Soraga Valerio Pederiva e a Moena Alberto Kostner. 
L é enveze amò en cors l scrutinie per l Comun General; l ejit no amò definitif de 7 sezions sun 10 moscia dedant l candidat procurador Edoardo Felicetti con 1721 stimes respet al candidat procurador Amedeo Valentini con 1275.

 (LG)