La Usc di Ladins

No la é stata tant auta la perzentuèla di litanc nience per l Comun General de Fascia, olache se metea dant 2 candidac procurador e 3 listes. Demò l 57,67 de chi che aea derit é jic a dèr ju sia stima. I dac no amò ofiziai ma con duta la sezions scrutinèdes disc che Edoardo Felicetti, sostegnù da la doi listes “Fassa” e “Autonomia per Fascia”, l à concostà 2.419 stimes, l 50,23% de la stimes valides, e so antagonist, Amedeo Valentini, sostegnù demò da la lista “Neva UAL” l se à fermà a 1851, l 38,43%. A livel de listes, a la “Neva UAL” l é jit l 44,41% de la stimes valides, enveze l 39,63% à lità per “Fassa” e l 15,97% per “Autonomia per Fascia”. A livel de stimes personèles l é da uzèr fora l ejit de Luca Follador te la lista “Neva UAL” che l à ciapà ben 435 stimes, dant da Riccardo Donei con 412. Te la lista “Fassa troon enveze al prum post na femena, Lara Battisti”, con 344 stimes; al secondo post Matteo Iori con 227. Te “Autonomia per Fascia” al prum post Alberto Compagnoni da Moena con 146 stimes e secondo Bernardino Chiocchetti, semper da Moena, con 132 stimes. De più su La Usc stampèda de en vender ai 9 de mé.  (lg)