La Usc di Ladins

L an 2025 l é stat n bon an per la sozietà de impianc portamont SITC de Cianacei. L lo à confermà l president Daniele Dezulian vardan ai dac del bilanz serà su ai 31 de dezember e aproà dai sozi te la radunanza chiamèda ite ai 30 de jugn (prejenc 68 sozi con 34 deleghes che raprejentèa l 73% del capital). Positif l utol de ejercizie che é de 7.675.187 euro, enceben che l sie mender respet al an dant che era stat de 13.391.391 euro. L valor de la produzion passa da 43,7 milions de euro a 44,7 milions, ma se smaora ence i cosć de la produzion da 27,3 milions a 33,4 milions, l é jit su soraldut chi per servijes che da 10,5 milions rua a 13,3 milions, leé a la speises per la neva cabines del impiant de Pian Frataces e per aer trat ju la stazions de la veia forenadoa de Ciampedel (per n cost de 630.000 euro).

Ence la SITC vèrda a la fujion. Te chest an l é jit inant l’analisa e la pianificazion per na reorganisazion de la sozietà che à en program l an che vegn la fujion con la Ciampac & Contrin su la pedies de la neva sozietà Ciadenac Bufaure spa benefit. L an che vegn de mèrz la SITC festeja 80 egn de vita, sarà l’ocajion giusta per prejentèr i neves obietives.

Podede lejer dut su La Usc stampèda dai 24 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Monica Cigolla)