La Usc di Ladins

La nomina é stata ofizialisèda: col prum de setember la prof.a Mattea Eccher tolarà l post del prof. Federico Corradini a cef de la Scola de Fascia. La neva, ruèda ai 18 de messèl dal Ofize Stampa PAT, fèsc referiment a n provediment de la Jonta provinzièla. La delibera, prejentèda da l'assessora a l'istruzion Francesca Gerosa per aproèr la graduatoria del concors, é stata aproèda da la Jonta provinzièla ai 17 de messèl e l'à coscita ofizialisà l ejit de la proes de ejam per l'encèria de Sorastant che se aea serà su ai 19 de jugn. Se sà che, aldò de la lege provinzièla, chesta encèria à regnèda 5 egn e la pel vegnir renovèda demò n'outa. Sun chest l é jà stat palesà vèlch conscidrazion critica, anter i etres ence da man del Conseier de procura del Comun General de Fascia Bernardino Chiocchetti che à te sia esperienza ence chela de dirigent. La costion podarà vegnir touta dant dal Consei General de l'Istruzion e Formazion, organism olache la costions che revèrda la Scola de Fascia vegn toutes dant dai raprejentanc de desvalives setores de la comunanza: la presidenta Tea Dezulian à anunzià che la enten l chiamèr ite l meis de setember.

Aon rejonà coi doi Sorastanc, Corradini che resta en cèria fin a la fin de aost e Eccher che scomenzarà con l prum de setember. I à jà scomenzà informalmenter a se enjignèr al passaje del testamonech, spetan de ciapèr comunicazions: l bando defat perveit per tor su l'encèria ence n temp de proa con na formazion de 150 ores con n tutor, ma sun chest endèna no se sà de auter. L Sorastant Corradini à tout pèrt ai 11 de messèl al Dì dla Unité Ladina a Corvara, olache l à portà n referat su la doura del ladin te la Scola de Fascia; l é jit via ensema con la neva Sorastanta Eccher e con l diretor del OLFED Alessandro Margoni e l é stat na ocajion percacenta de contac, cognoscenza e confront.

Podede lejer dut su La Usc stampèda dai 24 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)