La Usc di Ladins

L é n resultat da segnèr te la storia de la trata con l archet trentin, chel arjont a Nové Město, te la Republica Ceca tel para-archery. L merit l é de Christian Seneca, atlet paralimpich che fèsc pèrt de l’A.P.D. Kosmos Rovereto ma l é enciasà te Fascia, olache l se cruzia de slarièr fora chesta bela disciplina anter i joenec.
Dai 30 de jugn ai 4 de messèl a Nové Město l é stat metù a jir la World Archery Para Series, competizion mondièla paralimpica, olache Seneca à desmostrà duta sia braura e determinazion con l archet Compound ruan en ultima, vèrech do vèrech, a se vadagnèr la medaa de or.
Ben segur na gran emozion per Christian Seneca, che do egn de empegn l é stat bon de arjonjer la pruma venta a livel internazionèl, n ejit che l à fat ence ruèr per la pruma outa tel Trentin.

Podede lejer dut su La Usc stampèda dai 17 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)