La Usc di Ladins

En Santa Tarina, mertesc ai 25 de novëmber, á i aministradus comunai, cun i assessurs dla Junta, i mëmbri dl Consëi y i colaboradus y lauranc dl Comun de Corvara, tut l’ocajiun da rengrazié ciamó n iade l’ombolt da denant Robert Rottonara, che é gnü cherdé sön palch a pié do na onoranza particolara.

Sciöche sëgn de reconescënza ti á l’ombolt da sëgn surandé na recordanza en rapresentanza dl Comun, por ti dí ciamó n iade dilan por döt l’impëgn dediché al Comun de Corvara ti agn de süa inciaria. Por bëgn 35 agn é Robert Rottonara sté atif te Comun - ­ 15 agn sciöche ombolt y vize, y ciamó denant sciöche asses­sur te Junta y mëmber dl Consëi. Na spana de tëmp valgamia lungia y che á ince porté deplü desfides – danter chëstes ince le tëmp dla pandemia y deplü roes. Cun val’matada implü él gnü alzé fora la dediziun y la costanza, che á acompagné l’ex­ombolt te süa inciaria. La comunité á saludé Robert cun n aplaus sterch, denanche lascé pié ia la gran festa.


Deplü noeles ciafëise da lí tla ediziun nöia da en vëndres, ai 5 de dezëmber!