La Usc di Ladins

L zil de abiné adum ladins da dutes les valedes dles Dolomites é vegnù arjont en domenia a Sèn Jan. L Di dla Unité Ladina, che la Union Generela di Ladins dla Dolomites met a jì vigni ann entourn i 14 de messel, per recordé la gran adunanza di Ladins sun l jouf de Sela dl 1946, se à dejout chest ann ai 13 de messel en colaborazion con la Union di Ladins de Fascia.

Per chesta ocajion à la presidenta Milva Mussner pensé a na vida mingol lesiera per tegnì adum i ladins, con mujiga, filmac, retrac: adoré i lingac moderns per ti ruvé davejin ence ai joegn.

Zil arjont, dijoven, ajache a Sèn Jan é ruvé ladins da dutes les valedes y ence da Bulsan su. Tla sala grana dl Istitut Cultural Ladin fovel i presidenc y velch conseier de dutes les sezions dla Union Generela, reprejentanc istituzionai dles provinzies, dla region, dla majera pert di comuns de Fascia y ence zachei da d'autri comuns dla Ladinia. Segur nia tanc che al fova dl 1946 sun l jouf dl Sela (passa 3000, dijen) ma tanc da ne giaté nia carieghes assé per se senté ju.

L domesdì é vegnù avert con l salut per ladin dolomitan da Monica Cigolla, che à tegnì la moderazion dl event y ti à sport l benvegnù a dutes y duc, y daldò con la pruma ciantia dl grop fascian Popcorner dal nuef CD ‘Utar piata’: la bela oujes de Mary, Melany y Sabrina, compagnedes ai strumenc da Gianpaolo, Nicolò y Daniele à enterzà i intervenc, portan na venteda de lesiereza.

Se pel lejer dut su La Usc nr 27 dai 18 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)