La Usc di Ladins

Do passa doi egn dal scomenz di lurieres, en lunesc ai 14 de messèl, l é stat inaugurà ofizialmenter i neves trampolins del saut de Pardac, fac su del 1989 per i Campionac mondièi de schi del 1991. N moment spezièl a la prejenza de l’autoritèdes locales e provinzièles, ma ence de atlec e atltes de saut e combinèda nordica de la Nazionèla talièna che à proà la neva strutures omologhèdes jà la setemèna inant. I trampolins del stadie del saut G. Dal Ben de Pardac l é la pruma opera fenida tel Trentin per la Olimpiades del 2026, amancol per chel che vèrda la pèrt sportiva, con i zertificac de l’omologazion che é stac consegné al ombolt de Pardac Paolo Boninsegna dal president de la Fisi Flavio Roda.

L cantier no é amò stat serà su deldut ajache l é amò da portèr a compiment i lurieres per la strutura destinèda ai giudizes de gara e ai servijes e per l lift che vegn fat su apede al trampolin più a nord, l HS109, che permetarà no demò ai atlec, ai tecnics e ai giudizes de gara de ruèr te sia postazions, ma ence al publich de ruèr sunsora ai trampolins e veder coscita dal aut la garejèdes.

Se pel lejer dut su La Usc nr 27 dai 18 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Monica Cigolla)