La Usc di Ladins

La era stata anunzièda anter la polemiches, la scomenzadiva metuda a jir en domenia ai 27 de messèl a Daian, forin Fiem: na scomenzadiva de solidarietà, endrezèda dal Grop Emergency de Fiem e Fascia, con a cef la presidenta Orietta Gabrielli, per sostegnir l'atività che la sociazion metuda su da Gino Strada porta inant anter mile dificoltèdes ence a Gaza. L'idea l era chela de enjignèr, per la pruma outa ence te Fiem, la »pasta antifascista«.

La »pasta antifascista«
Se trata de na scomenzadiva oramai storica, ajache la é nasciuda ai 25 de messèl del 1943 a Campegine te l’Emilia per endrez de la familia Cervi, stata fin dal scomenz contra l fascism, che do aer sapù de la destituzion de Mussolini l'à pissà de festejèr chest aveniment con duta sia comunanza e l'à portà te piaza quintai de pasta per ge la sporjer a duc. Ampò l era amò massa prest per fèr festa: de dezember del 1943 duc 7 i frèdes partejegn Cervi é stac copé per rapresalia.
En recort de chisc fac l é nasciù la »Rete delle pastasciutte di casa Cervi« che la se à slarià fora te duta la Tèlia e ence foravia, con scomenzadives per uzèr fora i valores de condivijion, antifascism e democrazia.

Bonamans per l ospedèl de Emergency a Gaza
Forin Fiem l é stat pissà de ge jontèr ite a la »pasta antifascista« n segnificat amò maor, chel de didèr la popolazion de Gaza, che la é do a padir na situazion tremenda zenza che i goernanc troe na soluzion. L'idea de Emergency à troà sobito l sostegn concret de la Pro Loco e del Comun de Ville di Fiemme, de l'ANPI del Trentin col president Mario Cossali e de la Unità Pastorala Santa Maria del Cammino. Ampò l é stat vèlch esponent politich che à pissà de la critichèr publicamenter.
La resposta se à fat sentior forta e chièra: en domenia a Daian l é stat dat fora passa 400 piac de pasta: pasta biencia, con smauz e grana, coche l era chela de la familia Cervi, con prodoc che era stac razioné endèna la vera. L é stat n bel moment de condivijion, compagnà da la paroles de la presidenta Orietta Gabrielli, che à rejonà de l'atività de Emergency e de la neves ruèdes chisc disc passé da Gaza. L era ence l president de l'ANPI del Trentin Mario Cossali, che l à rejonà del la storia e del segnificat che pel aer magnèr adum n scempie piat de pasta, ma ence del perché che amò anchecondì l é emportant no lascèr desvanir la parola antifascism, che l é l fondament de la Costituzion e de la Republica talièna, enceben che a zachei chesta parola ge fae tant festidech.
Apede a la pasta, enjignèda sot l endrez del chef Stefano Tait, l é stat dat fora ence fietes de anguria, che con si colores vert e bianch de la scorza, ros de la polpa e neigher de la semenzes la recorda apontin la bandiera de la Palestina.
A compagnèr la marena l é stat la letures de Flora Sarubbo e Pietro Marchi de la Compagnia ControTempo Teatro de Busan, che se à metù a la leta debant, e con cianties desche »Il disertore« de Ivano Fossati e »Bella Ciao«, ciantèda da duc adum.
Dassen grana la partezipazion, con ence vèlch raprejentant e raprejentanta de la aministrazions, e no l é mencià nience l paroch don Albino Dell'Eva. N suzes che é jit sorafora vigni previjion e che à permetù de binèr adum n gran bel didament per Gaza: dut chel che é vegnù ite dal bèst, al net da la speises vives, jirà per l’atività de Emergency te la striscia de la Palestina olache picioi e gregn mor de bomber e de fam, e apede l é stat binà su amò passa 2000 euro de bonamans con la medema destinazion da man del Grop Emergency de Fiem e Fascia, che con gran sodesfazion l vel ge dir develpai a duc chi che à didà, lurà e tout pèrt.

 (Lucia Gross)