La Usc di Ladins

Stravardèr l ladin ence ti contesć più sensiboi de la comunità, desche chi dediché a la cura e l’assistenza de la jent de età. Con chest obietif la Region Autonoma Trentin Südtirol, aldò de la proponeta del assessor regionèl a la previdenza sozièla Carlo Daldoss, l’à metù a la leta n contribut de 240 mile euro per doi Aziendes publiches di servijes a la persona atives sui teritories ladins, per ge fèr front a la maor speises leèdes a la doura del ladin fora per l 2025.
»L aane emprometù e sion do che l fajon - à declarà l President de la Region Arno Kompatscher – volon valorisèr concretamenter la cognoscenza e la doura del ladin ti servijes loghé ti teritories ladins. L é de gran emportanza rejonèr co la jent de età te la strutures residenzièles duran sie lengaz, percheche chest vel dir respet, vejinanza e calità de la cura. Per chesta rejon aon pervedù neves finanziaments per la cèses de paussa, percheche les posse tor su personèl bon de comunichèr ence per ladin«. 
La doi strutures enteressèdes l é la Cèsa de Paussa de Fascia a Sèn Jan (pech più che 21 mile euro), che la gestesc na strutura residenzièla con 65 posć, e la Ciasa de Palsa Ojöp Frëinademetz a San Martin de Tor (220.000 euro), che ge dèsc alberch a presciapech 89 jent de età e olache laora 109 dependents de chi che 30 i é a temp pien e 79 a temp smendrà; anter chisc 12 no ciapa la indenità per la doura del lengaz ladin, ajache no i à l atestat linguistich pervedù da la normativa.

Se pel lejer dut su La Usc nr 29 dal prum de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.