La Usc di Ladins

Per cotant de temp podarone amò veder la giacia de nesc giacees? La resposta a chesta domana é piena de cruzies. No se trata segur demò de na costion de parbuda, ma de dut chel che l é dovia l ecosistem de nesc jiganc de giacia e chel che sie smendrament, o piec, sia desvanida, pel voler dir per dut l ambient e en particolèr per la vita de l’umanità. Sun chest e etres temes che revèrda l ambient, coi mudamenc climatics e sia conseguenzes, te chest istà del 2025, an internazionèl per l stravardament di giacees, l MUSE con sie Museo geologich de Pardac, adum con l Trento Film Festival e l Comun de Pardac, à endrezà na lingia de proiezions con entrèda ledia e debant, per vardèr, cognoscer e entener chesta realtà da desferenc ponts de veduda, vejins e più dalonc tel temp e ti lesc.
La proiezions vegn metudes a jir vegni jebia del meis de aost, da les 21:00 tel Cinema teater de Pardac.
Se pea via ai 7 de aost col film ‘Donde los arboles dan carne’ del regist argentin Alexis Franco, che à venciù la Genziana d’arjent al Trento Film Festival. Se trata de na produzion del 2024 (72 menuc) che met adum Argentina, Spagna e Stac Unii olache vegn contà la storia de n arlevador che con sia familia cogn scombater contra problemes e dejastres di evenc naturèi e a didèr a meter al luster segnificac e valores de chest film sarà ence l critich cinematografich Miro Forti.
Te la setemènes do sarà en program ‘Svalbard: Silent Games’ de Francesco Biscaglia ai 14 de aost, che revèrda costions che tol ite la popolazions de norvegeisc, rusc e ucrains, dapò ai 21 ‘La Casa Rossa’ de Francesco Catarinolo che ne mena te la Groenlandia, con l intervent de Matilde Peterlini del MUSE e  ai 28 ‘Apple Cider Vinager’ de la belga Sofie Benoot, che mena te n viac anter i sasc, con lurieranc palestineisc, n pascionà geologh ingleis e la jent che vif sui campes de lava di Fogo (Capo Verde). A compagnèr chesta proiezion sarà Riccardo Tomasoni del Muse.  (Lucia Gross)