La Usc di Ladins

Don Luigi ge aea domanà al Segnoredie la grazia de morir da curat de Ciampedel e chiò restèr a spetèr la resurezion. Chesta la convinzion palesèda en domenia ai 12 de oril te gejia de Ciampedel da Vigilio Lazzer a inom de la comunanza parochiala e dal Piscop don Lauro Tisi, dedant a na gejia piena de jent che se à binà da les trei domesdì per recordèr, rengrazièr e onorèr don Luigi Trottner.
L Segnoredie se lo à chiamà apede ai 13 de mèrz del 2020: don Luigi l aea 86 egn e da 21 l rejea la parochia de Ciampedel; l é stat l prum preve vitima del Covid. La mort sobitousa à secodì sia volontà, ma la ge à neà a el e ai fidei si parochiegn l derit a n ultim salut, n braciacol e na zerimonia de obit cristiana.
Ma la recognoscenza, vèlch outa, no va perduda e do 6 egn la jent da Ciampedel, familiares e amisc da Vich, paisc de naa de don Luigi de Focol, devoc rué da etres paijes de Fascia, à podù ge palesèr sie detelpai e sie benvoler a chest preve, che à vidà la comunanza per passa 20 egn.
La zelebrazion é stata averta dal salut de don Mario Bravin, che ge à dat l benvegnù al Piscop Lauro Tisi, che ence se empegnà te la vijites pastorales no l à volù mencèr a chest moment.

Podede lejer dut su La Usc dai 17 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)