La Usc di Ladins

Joegn e joenes de Fascia, ence chest an l Pian di joegn La Risola met dant desvalives projec pissé per voetres! I é stac porté dant en antepruma en mercol passà te Sorastanza de la Scola Ladina. Ismael Pellegrin, sostitut e assistent del RTO (referent tecnich organisatif) Armin Wiedenhofer, ge à dat l benvegnù ai prejenc, autoritèdes, projetisć e componenc del desch de lurier. La vizeprocuradora Lara Battisti à portà l salut del conseier Samuel Lazzer, con delega a la politiches di joegn e che no à podù esser, uzan fora la valuta de endrezèr projec ouc ai joegn acioche i posse crescer e fèr comunanza, l più gran investiment per nosc davegnir.

Pellegrin à metù dant i obietives del Pian di joegn La Risola per i egn che vegn: smaorèr l numer de projec e projetisć coscita ence la perferida outa ai joegn e soraldut vardèr de i tor ite de più tel desch de lurier. Na pèrt di finanziamenc a desposizion vegn duré per sostegnir la scomenzadives, chel che vanza per la formazion del desch e di operatores; Pellegrin à metù dant ence l report anual de l’atività. La Risola à trei referenc: l RTO Armin Wiedenhofer, l referent istituzionèl Samuel Lazzer e la referenta aministrativa Evelyn Bortolotti.

Se pel lejer de più sui 4 projec cernui su La Usc nr 34 dai 5 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per ciapèr vigni vender l pdf a cèsa.



 (Nicoletta Riz)