La Usc di Ladins

Do la provinzia de Busan, che l’à tacà per pruma, ai 10 de setember aur si ujes ence la Scola Ladina de Fascia. Aon rejonà de neves e prioritèdes per la gran istituzion formativa de val col Sorastant Federico Corradini.

Peon via da la situazion di dozenc: co siede metui?
Sion metui mingol miec che l an passà, aon valch dozent che l é jit en ruolo te le mesane e é podù confermar zachei che aea n contrat a temp determinà, aldò de la lege provinziala nr 5 del 2006.

L an passà l era stat dit che per l smendrament del numer di studenc l era ensegnanc che risièa de perder l post, ma somea che sie senester i troèr. Co éla?
L é vera che col smendrament de le clasc pel esser ensegnanc che risia de perder l post, ence se ades la situazion somea belebon stabola, ma resta senester troar ensegnanc, soraldut ti degrees più auc per todesch e le materie matematiche e scientifiche, e amò de più per l ladin. Al prum colege di dozenc tol part demò chi a temp indeterminà che i é zirca 70; chi a temp determinà, ence per l ladin, i vegnarà ite per i 10 de setember.

Coluna él la roba de maor emportanza che aede metù dant per duta la Scola? 
Chest an é pissà de meter l focus sul valor de na bona inclujion scolastica, ensema con le dozente Francesca Zulian e Maria Elena Bordinazzo, che ge stasc do a chest. L é emportant respetar dalvers dute le normative che revarda i studenc con besegnes educatives speziai e i bec con dsa, che i é semper de più te la scola. La lege 170 del 2010 à definì chisc desturbes e le scole cogn personalisar didatica e metodologia e desferenziar verifiche e proe. L é n gran lurier per i dozenc, ma peisse che l bon star de duc te scola e l giust sostegn ai bec che fasc più fadia sie un di prumes obietives che na scola cogn se meter dant aldidanché.

Se pel lejer duta l'intervista su La Usc nr 34 dai 5 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per ciapèr vigni vender l pdf a cèsa.





 (Lucia Gross)