La Usc di Ladins

La situaziun dla Dlijia te nosta valada se müda tresfora y alüsc ince debota. I tëmps cun ploans te vigni cöra y mësses vigni de é oramai passá. Te val’ ploanies n’él gnanca plü vigni domënia mëssa. Rodunt porchël ân metü man tla Unité Pastorala Val Badia da chirí porsones laiches che se formass por tigní Zelebraziuns dla Parora, canche ara ne vá nia da avëi n prou che dij mëssa. La jënt s’aüsa bel plan da les tó sö y les azeté.
N vare plü inant vá les Zelebraziuns dles Sopoltöres. Ara se trata de na Zelebraziun dla Parora cun le ritus dla sopoltöra, che pó gní tignides ince da laics. Por podëi le fá ól ester na formaziun aposta. Tla Diozeja de Balsan/Porsenú él gnü stlüt jö da püch le secundo curs, che s’á desfiré da novëmber 2023 cina ala fin de jügn 2025. Danterite él sté bëgn 17 dis de curs, olache al é gnü traté n gröm de aspec incër le ritus dla sopoltöra: dal acompagnamënt dal punt d’odüda psicologich cina ala forma, sambëgn la liturgia cun la pordica y les cianties cina al regolamënt da tigní ite por che reverda scrins, urnes o la deposiziun dl cënder. Ai 27 de jügn ti á le Vësco Ivo Muser surandé l’atestat de partezipaziun a 33 porsones de nosta diozeja, cun la novité che al ê lapró ince les prömes döes porsones dla Val Badia: Annamaria Fiung da La Val y Lois Kastlunger da La Ila. Pro la surandada di atestac á le Vësco rengrazié i partezipanc da s’avëi metü a desposiziun por n sorvisc te na fasa sensibla dla vita umana: "Rodunt ti momënc de plüra pó la Parora de Dî gonot dí deplü co les parores dles porsones". Deplü sön chësc sorvisc nü por nüsc paisc y sön ci desfarënzies che al é, ti unse damané a Annamaria Fiung. 

 (pablo)