La Usc di Ladins

La "Club5 Sport Association" é na lia che cöi adöm i comités d’organisaziun prinzipai de gares de copa dl monn de schi alpin. Metüda sö l’ann 1988, á chësta organisaziun le fin prinzipal da sostegní y svilupé inant le sport di schi y da sostegní sambëgn ince le barat de esperiënzes y förtli danter i comités d’organisaziun, sciöche ince da rapresenté i interesc di comités ti confrunc dla FIS y dles federaziuns nazionales, tolon pert a grëmi y comités desvalis. L’ann 1988, canche l’assoziaziun é gnüda tuta sö por interessamënt dl fondadú dla copa dl monn y jornalist sportif Serge Lang, êl ala pert les cin’ gares classiches de discesa: Gherdëna tla Ladinia/Talia, Garmisch–Partenkirchen tla Germania, Kitzbühel tl’Austria, Wengen tla Svizera y Val d’Isère tla Francia. Cun le passé dl tëmp él gnü tut sö na dërta linia de comités d’organisaziun fora por le monn. I pröms dui mëmbri nüs ê rodunt comités ladins: dl 1994 gnôl tut sö l’Alta Badia, dl 1997 Cortina d’Ampëz.
Danter chi che s’á candidé da püch da gní tuc sö toca ince le comité "Al Plan Events" che organisëia la gara de copa dl monn de Plan de Corones sön la "Erta" d’Al Plan y le comité "Gregn Evenc" dl APT de Fascia, che organisëia la gara dles ëres sön la "Volata" sön San Pelegrin. Y ara é garatada. Süa candidatöra é gnüda tuta sö ofizialmënter en jöbia ai 25 de setëmber en gaujiun dla reuniun generala dla "Club5 Sport Association" a Zürich tla Svizera.  (pablo)