La Usc di Ladins

Enstadì l’Autorità per la Mendranzes linguistiches de la Provinzia de Trent à prejentà sia atività, con la relazion anuala perveduda da la lege provinzièla. Apontin la L.P. nr 6 del 2008 su la mendranzes linguistiches à pervedù chest organism, autonom ma logà daite dal Consei provinzièl: n organism che tol ite trei componenc con competenza giuridica e culturala, e de chisc un:a con funzion de president:a, che cogn vardèr sora e controlèr l’aplicazion e la percacenza de la normes per la popolazions de lengaz ladin, mochen e zimber che vif sul tegnir de la provinzia de Trent e su la ressorses che ge vegn destinèdes, ence con segnalazions e proponetes.
Do i prumes 7 egn peé via del 2014 co la presidenza de Dario Pallaoro e l’avocata de Fascia Luciana Rasom, dal 2021 la neva Autorità à desche presidenta la avocata fascèna Katia Vasselai. 
En vender ai 3 de otober a Trent te la Sala Aurora de Palaz Trentini l president del Consei provinzièl Claudio Soini ge à dat l benvegnù a la presidenta Vasselai e a Chiara Pallaoro e Matteo Nicolussi Castellan, i etres doi componenc de l’Autorità, che à chiamà ite i conseieres e assessores de la PAT e i raprejentanc de la trei mendranzes linguistiches per ge prejentèr l’atività portèda inant, la situazion, i problemes e la endesfides de chesta comunanzes.

Se pel lejer dut su La Usc nr 39 dai 10 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Lucia Gross)