La Usc di Ladins

N sada dl'ena passeda à l Hc Gherdëina fat al savëi, che n ne n'uel nia plu lauré inant cun l alenadëur Teppo Kivelä. L finlandesc, che fova l ann passà d'instà ruvà te Gherdëina, ne n'ie te chësc ann y mez nia stat bon de arjonjer i resultac che n ëssa sperà. Do che n à perdù nuef dla ultima diesc partides ne n'ova i sëurastanc dla lia nia plu crëta te ël. N ie tl lëur de crì n sostitut, che sibe bon de tré ora l hockey Gherdëina da chësc busc. Per ntant mëina Elmar Parth la scuadra. L HC Gherdëina rengrazia te si comunicat stampa Teppo Kivelä per si mpëni y ti mbincia dut l bon per si daunì.

Do che n à tëut y tres l alenadëur se ëssen povester bele n sada aspità na resposta da pert dla scuadra, ma la ne n'à nia ulù vester. Contra i Wipptal Broncos de Sterzing tl stadio Pranives te Sëlva à chëi de Gherdëina dat dut y i à nce abù de bona ucajions, ma l resultat ne n'i à nia premiei. La scuadra de Sterzing à venciù l juech per 6 a 2, ne ti lascian degun pont a chëi de Gherdëina.

Do sies juesc perdui ndolauter muessa l Hc Gherdëina śën cialé de abiné inò la forzes y l cë per pudëi inò vëncer vel' juech. Povester ti garàtela chësta juebia ai 27 de nuvëmber contra l Jesenice te Sëlva.

EK