La Usc di Ladins

No l é stat demò n domarena de letradura, ma na fona imerscion di sensc, chela che l é stat l met de sperimentèr ai 12 de firé te la Sala grana del veie Comun jun Busan. La zità, crousdevia de cultures, à responet con gran entusiasm a la prejentazion de »Stella e la Regina delle Dolomiti«, l’ultima opera de Alberta Rossi publichèda da Valentina Trentini.
La sala era piena de jent, n mosaich de persones che raprejentèa l’ènema trilinguala de noscia provinzia: jent de lengaz talian, todesch e ladin se à binà, con jent vegnuda aposta ence da la valèdes ladines e da Trent. La scomenzadiva é stata voluda da la Comunanza Ladina de Busan e da la Consulta Ladina, istituzions che laora da semper per l dialogh culturèl te la zità de Busan. A verjer la sera l é stat Sabina Willeit, Presidenta de la Comunanza Ladina a Busan, che à dat l benvegnù con n salut istituzionèl per talian, todesch e ladin. Na desmostrazion de atenzion de gran valor che à sotrissà amò de più l spirit del event: na zelebrazion de la convivenza e del recognosciment de una co l’autra de la cultures che vif te nosc teritorie.
Sobito do, la parola é jita a Alberta Rossi. L’autora, fegura de emportanza tel panorama leterèr de nosc raion (sozia de la SAAV e de la Sociazion Scritores de Busan), à sapù encantèr l publich prejentan sie lurier con na reflescion fona sul significat de partegnuda e su la forza de la reijes.

Podede lejer dut su La Usc dai 27 de firé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)