La Usc di Ladins

Suns Europe é n Festival dles erts ti lingac minorisés d'Europa che se dejujarà a Udin y te autres luesc dl Friul via per l meis de otober. Sie obietif é de valorisé y mete a confront les produzions artistiches plu enteressantes di picoi lengac, en particolar les esprescions contemporanes che tò ite mujiga, chino y leteratura.

L event vegn metù a jì da la cooperativa 'Informazione Friulana', editoura de 'Radio Onde Furlane', col sostegn finanzial dla Region Autonoma dl Friul y de autres sogec publics y privac dl post y internazionai.

Artisć y grups podarà se fé conesce con sia esibizion te conzerc dal vif te deplù luesc dl Friul y i miours selezionés podarà jì su la paladina tla sera finala dl festival, en program a Udin ai 10 de otober.

La bandida de concurs per podei tò pert é daurida. Artisć y grups enteressés mess scrì ite dant dai 15 de messel l formular online sun l sit www.sunseurope.com. Adum con l formular messen mandé ite duc i materiai pervedus dal concurs. La selezion vegnirà fata dant dai 16 de agost; i partezipanc vegnirà avisés tres mail. Per avei de autres informazion pòn vedei l sit o scrive na mail a  info@sunseurope.com.

 (LG)